Despedimos a Bruno Marton e Laura Rodríguez U.

Bruno Marton primeiro e agora Laura, tiveron que deixar o noso centro escolar. Seguirán os seus estudos noutros colexios e seguro farán amigos e amigas coma os que deixan aquí.

Bruno Marton estivo con nós só sete días lectivos pero deixou pegada en todos e todas e o recordamos con agarimo. Continuou a súa viaxe acompañando a súa familia coa exposición «Dinosaurs Tour», a maior exposición de dinosaurios animatrónicos que estivo no IFEVI do 30 de novembro ao 8 de decembro.

Laura en cambio, retorna a súa vila natal de Ponteareas e alí seguirá os seus estudos onde esperamos lle vaia estupendamente.

Bruno e Laura: botarémosvos de menos!!

Desexarvos o mellor no futuro.
UNHA GRANDE APERTA!

Charla PLAN DIRECTOR 2019/20: Acoso Escolar

En decembro tivo lugar unha nova charla sobre o Acoso Escolar, dentro don PLAN DIRECTOR para a Convivencia e Mellora da seguridade nos Centros Educativos e os seus entornos, dirixida ao noso alumnado de 5º e 6º de Primaria. Charla co obxectivo de proporcionar aos menores información xeral sobre este problema de seguridade que pode afectarlles e ter un mellor coñecemento de como enfrontarse a el e as súas consecuencias penais.

SEMANA ESCOLAR DO CAMIÑO DE SANTIAGO

No ano 2021 celebraremos un novo XACOBEO. Para este curso a Comisión Organizadora do Xacobeo-21 vén de programar a SEMANA ESCOLAR DO CAMIÑO DE SANTIAGO, dirixida aos cursos de 5º e 6º de Primaria, do 25 ao 29 de novembro. Nós participamos co obxectivo como dí o programa «de aprender aspectos importantes relacionados co Camiño Francés de Santiago dun xeito entretido, lendo e tomando como base unha aventura creada con esta finalidade». A investigación que realiza a Ecopanda (protagonistas da historia), para descubrir uns roubos de pezas románicas, foi a perfecta escusa para traballar en equipo percorrendo o Camiño Francés de Santiago dun xeito diferente, utilizando a guía que acompaña á historia de ficción.

Semana Escolar do Camiño de Santiago 2019

Coñecendo a flora e a fauna da nosa contorna

A comezos de decembro levamos a cabo unha saída pola contorna do colexio para observar e coñecer mellor a flora e a fauna que nos rodea.

Para este curso precisamente o tema do proxecto da Biblioteca escollido ten por título «Flora coñece a CARBI». É por isto que nos centraremos a partir do segundo trimestre neste especial aspecto da natureza e será fío condutor dalgunha das nosas actividades ao longo do curso. 

Estamos a comezar tanto en 5º como en 6º o tema das plantas polo que, unha saída neste momento, para coñecer o estado da natureza ao noso arredor é necesario e moi oportuno. Así tamén contrastaremos o estado da mesma cos cambios que se van producir cando chegue a primavera. 

Para esta actividade contamos coa colaboración dun pai e unha nai: Manuel e Amalia, que como biólogos que son, foron uns guías estupendos para todo o alumnado. O noso agradecemento.

Coñecemos a flora e fauna da nosa contorna en outono-inv.

Charla PLAN DIRECTOR: Violencia de Xénero

O día 25 de novembro, día no que se conmemora anualmente o día internacional da eliminación da violencia contra a muller, tivo lugar unha charla no centro dirixida ao alumnado de 5º e 6º de primaria a cargo dunha policía nacional. O obxectivo dentro do programa educativo «PLAN DIRECTOR», é proporcionarlles ás nenas e nenos información xeral sobre este problema grave que afecta a nosa sociedade, e na que elas e eles van ter un papel determinante para tentar conseguir a súa erradicación o antes posible.

Facer «Clic» na imaxe para ver máis.

Exposición Oral: «O Teixugo»

Unha vez máis este curso puidemos disfrutar cunha nova exposición oral en 6º que prepararon nesta ocasión Antía Pedrosa Mariño e Candela Otero Álvarez. Aproveitando que estabamos a tratar en Ciencias Naturais o tema dos animais, faláronnos dun fermoso habitante dos bosques da nosa contorna e que puidemos coñecer mellor: o teixugo.
Grazas a elas puidemos ver en primicia imaxes que na nosa paisaxe tan transformada de Vigo pensabamos que serían cousa do pasado.

A súa intervención resultou sobresaínte e moi interesante para todos e todas.

O Teixugo - Candela e Antía 6º

Programa de Educación Viaria para 6º de Primaria

O pasado xoves día 14 recibimos a visita de Pili, Policía Local de Vigo pertencente ao Departamento de Educación Vial, para dar unha charla de Educación Viaria ao alumnado de 6º de Primaria.

Estaba previsto, como outros anos, que 6º se trasladara ao PIT (Parque Infantil de Tráfico) do Castro para realizar prácticas como peóns e como condutores, pero dadas ás malas condicións metereolóxicas reinantes tivo que suspenderse e non puidemos disfrutar desa actividade.

Este programa lévase a cabo nos colexios do municipio co obxecto de formar na seguridade viaria e na prevención de accidentes. 

 Para máis información
 accedede a este artigo 
 dun diario da nosa cidade ➤Pulsa AQUÍ







 
 



Tamén na páxina web do Concello de Vigo, no departamento de ➤EDUCACIÓN VIARIA.

VISITAMOS O NOSO CONCELLO

O pasado xoves día 7 de novembro, visitamos o noso Concello. É unha visita que con regularidade facemos o alumnado de 5º e 6º para coñecer de primeira man o funcionamento das nosas institucións e, en particular, o funcionamento do goberno local e dalgúns dos servicios que presta aos cidadáns.

Como veredes nas imaxes da montaxe audiovisual, comezamos sendo recibidos polo persoal do Concello que guía a visita e que foron dándonos información de todo que fomos vendo: o salón de plenos a sala de prensa da alcaldía, a escola de danza, o laboratorio municipal  e a sala de control de tráfico da nosa cidade. 
No salón de plenos recibimos a visita do noso alcalde Abel Caballero, que se dirixiu a nós falándonos da importancia do lugar no que estabamos e animouinos a seguir estudando moito para poder chegar a cumprir os nosos sonos. Tamén nos dixo que a pista de futbol, cuberta recentemente, sería mellorada para que a poidamos disfrutar moito máis no futuro.

VisitaConcello5º6º-071120

ACTITUDE POSITIVA!!

Actitude Positiva

Exposición Oral: «MUNCYT»

O xoves 24 de outubro Joel Lago Corzón de 6º de primaria, levou a cabo unha nova exposición oral dirixida aos seus compañeiros e comapañeiras, dun traballo que preparou sobre o MUNCYT: «Museo Nacional de Ciencia y Tecnología». Inaugurado en mayo de 2012, o MUNCYT ten outra sede na Comunidade de Madrid e conta con máis de 15000 instrumentos científicos que datan desde o século XVI ata os nosos días.

Aproveitando que o anterior venres se desprazou coa súa familia ata a Coruña, visitou este museo por primeira vez para tomar boa nota do que alí puido ver e tamén tomou imaxes. De todo ilo informounos en detalle na súa exposición, que resultou moi interesante e entretida, e que expuso de maneira notable. Moi ben Joel!

Charla: «O BOSQUE É VIDA»

O pasado martes día 28 de outubro, tivo lugar no centro por segundo curso consecutivo, unha charla dirixida ao alumnado de 5º e 6º de Primaria baixo o título: «O BOSQUE É VIDA». 

Esta é unha iniciativa que ten como obxectivo promover entre os máis xóvenes a importancia dos bosques desde as perspectivas medioambientais, económica e social, difundir o peso deste sector en Galicia e divulgar o respecto e a educación en materia medioambiental.

  

A charla foi dada por dous axentes forestais da Xunta de Galicia.

Aquí tedes en imaxe tres momentos da mesma.

Exposición Oral: «A SERRA DO XISTRAL»

Comezamos este curso unha serie de exposicións orais a cargo do alumnado de 6º no que presentarán na aula aos seus compañeiros e compañeiras contidos da súa propia elección con distinta temática. 

A primeira exposición correu a cargo de Antía Pedrosa Mariño, e tivo como título:

«A Serra do Xistral».

Aproveitando que Antía estivo uns días cos seus pais na Serra do Xistral, preparou para todos nós unha presentación power point, na que puidemos coñecer de primeira man esta fermosa serra galega e tamén amosou o que alí se atopou. Foi moi interesante e a todos gustou. Antía demostrou ser unha boa oradora, comunicou moi ben e deu mostras de saber moi ben do que estaba a falar, polo que tivo unha valoración de sobresaínte por parte de todas e todos. Noraboa!

VISITA DE GONZALO MOURE.

     Os nenos/as de sexto de primaria tivemos a inmensa sorte de que viñese á BiblioCarbi Gonzalo Moure, autor do libro "Palabras de Caramelo". Nesta visita falamos de Kori, de Caramelo, dos refuxiadxs, da morte e da vida  que,  tal e como nos dixo Gonzalo, hai que escribila.

Entrevistamos a MANUEL CARRERA NOGUEIRA

O pasado 10 de maio puidemos falar con Manuel Carrera Nogueira, antiguo alumno do Carballal nos anos 70 e que chegaría a ser doble campeón de España xuvenil en 1500 e 3000 m.

Formou parte dun grupo de atletas nados no 1967 que obterían grandes exitos para o fondo galego e español.

Contounos as súas vivenzas e percorrido na súa faceta deportiva e exitos obtidos e os seus anos de estudos no Carballal. Tamén compartiu con nós algunha que outra anecdota e respondeu as preguntas que os nenos e nenas de 5º lle fixeron para saber máis da súa vida.

Entrevista 5º Manuel Carrera 50 Aniv.

Visita a Santiago de Compostela

O pasado 5 de abril realizamos unha visita cultural programada a Santiago de Compostela, para realizar unha visita didáctica ao Museo do Pobo Galego e á Catedral de Santiago.

No Museo do Pobo realizamos dúas actividades autónomas, usando materiais subministrados polo propio museo: "Os tesouros de D. Antonio" e "Remuíño de pistas".

A primeira foi unha actividade dirixida ao alumnado de 5º, destinada a coñecer a vida e obra de Antonio Fraguas, homenaxeado este ano no Día das Letras Galegas e primeiro director do Museo a través dun xogo distendido de descubrimento; a segunda actividade destinada ao alumnado de 6º, que consistiu nun percorrido lúdico pola colección do Museo para poder descubrilo cunha dinámica de xogo de pistas.

A continuación, trasladámonos á Catedral de Santiago andando nun curto percorrido polo casco vello da cidade. Puidemos entón disfrutar dunha visita guiada ao recén restaurado Pórtico da Gloria, obra do xenial Mestre Mateo, considerada unha das obras cumbre da arte universal.

As nenas e nenos de 5º e 6º mostraron unha atención e comportamento sobresaíntes, destacados ao final pola guía da visita. Finalizar dicindo que a valoración da xornada foi moi positiva. 

Visita da escritora IRIA MISA

O venres 26 de abril recibimos a visita da escritora galega IRIA MISA. Viunos falar do seu libro «Mamá, quero ser Ziggy Stardust», obra ilustrada pola canguesa Alba Barreiro e na que conta a historia de Aine, quen con nove anos proponse chegar a ser como o seu ídolo, o «alter ego» do músico David Bowie: Ziggy Stardust.

Visita da escritora IRIA MISA 260419

Concerto Didáctico «Vigo en sons».

O día 11 de abril, o alumnado de 5º e 6º acudimos ao Auditorio de Concello de Vigo, para asistir a un concerto didáctico da E-Trad (Escola Municipal de Música Folk e Tradicional) que organiza o Concello. O obxectivo de "Vigo en sons" é divulgar entre os máis xóvenes o gran patrimonio musical tradicional de Galicia, e máis en concreto có que contamos na nosa cidade. O alcalde Abel Caballero acercouse a darnos a benvida durante a celebración do concerto. A actividade resultou moi proveitosa e a disfrutamos moito!!

Charla NANOSATÉLITES

O pasado día 3 de abril o alumnado de 5º e 6º tivo a oportunidade de asistir no centro a unha charla impartida polo inxenieiro de diseño electrónico Aarón Nercellas Ventas, pertencente á empresa española ALEN SPACE. As nenas e nenos puideron coñecer de primeira man o traballo desta empresa aeroespacial española no ámbito dos nanosatélites, e poder descubrir máis detalles de cada un dos planetas do noso sistema solar a través dos proxectos aeroespaciais que ata o momento o home puxo en marcha.

ESCOLLE UN!

Charla de Divulgación Medioambiental: "O Monte é Vida"

O pasado 29 de xaneiro o alumnado de 5º e 6º tivo a oportunidade de asistir a unha charla organizada pola Consellería de Medio Rural e do Mar, e impartida por un axente forestal no noso Centro.

Tiña como obxectivos fomentar o 

coñecemento da multifuncionalidade do

monte, da súa xestión sostible e divulgar a

importancia dos montes veciñais en 

Galicia.

En Galicia existen ao redor de 1.300.000 ha de monte cuxa propiedade ostentan 675.000 familias, ás que se suman outras 700.000 ha de monte veciñal en man común, cuxa titularidade corresponde a unhas 190.000 familias a través das comunidades veciñais das que forman parte.

Teatro Afundación: "TARZÁN"

O pasado 25 de xaneiro o alumnado de 5º e 6º asistiu no Teatro Afundación de Vigo á representación dunha obra teatral en lingua inglesa titulada "Tarzán". 

A representación correu a cargo da compañía Face 2 Face Theatre Co. 

A mellora do inglés, a superación persoal, o traballo en equipo e a expresión dos sentimentos son valores que puidemos apreciar na obra Tarzán. 

Inspirada no mundialmente famoso personaxe creado por Edgar Rice Burroughs e na súa novela, esta nova aventura cómica levou ao noso alumnado a sentirse coma nun safari. Toda unha aventura na que o propio alumnado puido interactuar cos personaxes e incluso algúns compañeiros e compañeiras foron invitados a participar do espectáculo, como foi o caso de Sergio Alonso F. de 5º.

  

 

 

A famosa Gloria Sánchez visita o Carballal!

Gloria Sánchez visitou ao Carballal  para  responder as dúbidas do alumnado de cuarto e sexto sobre o libro " Dez piratas" e outros da autora. As preguntas foron moi variadas e curiosas. Ademais diso asinou os libros e uns porquiños que fixeron os nenos/as de cuarto e algúns nenos/as de sexto. Gloria foi moi amabel con nós. Agora que está xubilada pode visitar colexios como o noso para aclarar e responder dúbidas doutros nenos/as. Se queres ver máis pincha na imaxe.

ASTRONAUTAS!!

Este ano imos de astronautas!! 

Hai que facer un mono con TEA DE ENTROIDO BRANCA seguindo os patróns que vos facilitamos na reunión e adaptándoos aos vosos fillos e fillas. Ao mono hai que coserlle cintas de cores, coma na imaxe,  que vos enviaremos coa maior brevidade.

Tamén hai que facer as botas con TEA FOAM GRIS, a imaxe é orientativa sería facer unha funda tipo bota lisa sen adornos. Se pinchades aquí tedes un tutorial. 

O pasado día 11 de xaneiro fomos visitar unha coñecida Pizzería no centro da cidade para saber máis da pequena empresa e da elaboración da comida máis consumida no mundo, e en España ao parecer o 2º trala ensalada. Tivemos a oportunidade de coñecer de primeira man a súa forma de elaboración artesanal, participar tamén no proceso e poder degustar o produto final. Incluso tivemos tempo de lecer disfrutando do espazo de xogo co que contan nas súas instalacións. De orixe romana, tal como a coñecemos comezou a elaborarse na cidade italiana de Nápoles no século XVII, e non se cubriu de queixo ata o século XIX.

 OS DE 6º

Visitamos

unha

PIZZERÍA